"Liverpul" jarohat olgan himoyachi Joel Matipning o‘rniga qishki transfer oynasida futbolchi qidirmaydi. Bu haqda Football Insider nashri xabar bermoqda. Eslatib o‘tamiz, 32 yoshli kamerunlik futbolchi APLning 14-turidan o‘rin olgan “Fulxem”ga qarshi o‘yinda (4:3) tizzasidan jarohat olgan edi.

Manba bergan xabarga ko‘ra, jamoa rahbariyati ayni damda markaziy himoya zonasida futbolchi uchun pul sarflashning hojati yo‘qligiga ishonch bildirmoqda. Qayd etilishicha, "Liverpul" transfer bozoriga faqat ushbu pozisiyadagi boshqa futbolchilardan biri jarohat olgan taqdirdagina kiradi. Bunda "mersisaydliklar" safiga o‘tish uchun asosiy nomzodlar "Sporting" va "Kristal Pelas" futbolchilari - Gonsalo Inasio va Mark Gexi bo‘ladi.

Joriy mavsumda Matip “Liverpul” safida barcha turnirlarda 14 ta o‘yinda maydonga tushdi. Futbolchining "qizillar" bilan shartnomasi 2024 yilning iyun oyi oxirigacha amal qiladi. Transfermarkt portali futbolchining narxini 12 million yevroga baholamoqda.