"Ливерпуль" жароҳат олган ҳимоячи Жоэль Матипнинг ўрнига қишки трансфер ойнасида футболчи қидирмайди. Бу ҳақда Football Insider нашри хабар бермоқда. Эслатиб ўтамиз, 32 ёшли камерунлик футболчи АПЛнинг 14-туридан ўрин олган “Фулхэм”га қарши ўйинда (4:3) тиззасидан жароҳат олган эди.
Манба берган хабарга кўра, жамоа раҳбарияти айни дамда марказий ҳимоя зонасида футболчи учун пул сарфлашнинг ҳожати йўқлигига ишонч билдирмоқда. Қайд этилишича, "Ливерпуль" трансфер бозорига фақат ушбу позициядаги бошқа футболчилардан бири жароҳат олган тақдирдагина киради. Бунда "мерсисайдликлар" сафига ўтиш учун асосий номзодлар "Спортинг" ва "Кристал Пэлас" футболчилари - Гонсало Инасио ва Марк Гехи бўлади.
Жорий мавсумда Матип “Ливерпуль” сафида барча турнирларда 14 та ўйинда майдонга тушди. Футболчининг "қизиллар" билан шартномаси 2024 йилнинг июнь ойи охиригача амал қилади. Transfermarkt портали футболчининг нархини 12 миллион еврога баҳоламоқда.
