«Qizilqum» futbol klubi bosh direktori Amin Ergashev va jamoa ma’muri Sherzod Toshev Turkiya Superligasi va PRO ligasi jamoalari vakillari bilan hamkorlikda bo‘lib o‘tayotgan seminarda ishtirok etmoqda.

Seminar doirasida o‘zbekistonlik mutaxassislar uchun 3 ta asosiy mavzuda: «Futbolchilar seleksiyasi hamda futbol agentlari bilan ishlash», «Futbol uchrashuvlarini tashkil etish va muxlislar bilan ishlash», «Marketing va chiptalar savdosi» bo‘yicha seminar bo‘lib o‘tadi. Bunda futbol klublarining 2024 yilgi mavsumga tayyorgarlik ko‘rishi va aniq rejalar ishlab chiqishiga ko‘maklashish ko‘zda tutilgan.

Seminar davomida Fenerbahche klubining rahbarlik organlarida faoliyat olib borayotgan O‘kan O‘zkan, Tezjan Shayli, Egemen Ergyuden, Galatasaray vakillari Murat Ersoy, Jenk Ergun, Nachi Jansun, shuningdek, Turkiya klublar birligi bosh kotibi doktor Chag‘ri Ilk o‘z ma’ruza va taqdimotlari bilan ishtirok etadi. O‘zbekistonlik mutaxassislar o‘z klubi faoliyati bilan solishtirish imkoniyatiga ega bo‘lishi uchun Fenerbahche hamda Galatasaray klublari tuzilmasi bilan to‘liq tanishtiriladi, ularga mazkur klublar infratuzilmasi, ish faoliyati to‘liq ko‘rsatiladi.

Seminar davomida Turkiya klublari bilan o‘zaro hamkorlikni yo‘lga qo‘yish ham rejalashtirilgan.

Qolaversa O‘zbekistonlik mutaxassislar Turkiya Superligasining 15-turidan o‘rin olgan “Galatasaroy” va “Adana Demirspor” hamda “Beshiktosh” va “Fenerbaxche” jamoalari o‘rtasidagi uchrashuvlarga ham tashrif buyurishadi.