"Nyukasl" bosh murabbiyi Eddi Xau jamoasining "Everton" bilan o‘yindagi mag‘lubiyati haqida fikr bildirdi.
"Ikkinchi bo‘limda hammasi bizning foydamizga hal bo‘lishi mumkin edi. Birinchi bo‘lim teng keldi va tanaffusdan so‘ng biz raqibga bosim o‘tkazdik, ammo "Everton" birinchi golni urdi va bu uchrashuvning borishini o‘zgartirdi. Biz o‘z imkoniyatimizni qo‘ldan boy berganimiz uchun hafsalamiz pir bo‘ldi.
O‘tgan mavsumda biz mehmondagi o‘yinlarda munosib ko‘rindik, ammo hozir safarda "Sheffild Yunayted"ga qarshi o‘yindan tashqari hech narsa qila olmaymiz. Tahlil qilish kerak bo‘lgan narsa bor", - dedi Xau BBC bilan suhbatda.
7 dekabr kuni Angliya Premyer-ligasining 15-turidan o‘rin olgan uchrashuv bo‘lib o‘tdi va unda "Everton" "Nyukasl Yunayted"ni qabul qildi. Unda mezbonlar yirik 3:0 hisobida g‘alaba qozonishdi.
