"Manchester Yunayted" yanvar oyida asosiy raqiblaridan yarim himoyachi sotib olmoqchi. Sky Sports ma’lumotlariga ko‘ra, Erik ten Xag "Manchester Siti" yarim himoyachisi Kalvin Fillipsni qishdagi asosiy maqsad sifatida belgilagan.
Eslatib o‘tamiz, angliyalik futbolchi katta ehtimol bilan yanvarda o‘z klubini tark etadi, chunki mavsumning ikkinchi yarmida u milliy terma jamoaning Yevropa chempionatida ishtirok etishi uchun ko‘proq o‘yin amaliyotiga ega bo‘lishni xohlaydi.
Fillips avvalroq Turinning "Yuventus" klubiga o‘tishi mumkinligi haqida xabarlar tarqalgan edi, u ijara asosida boshqa jamoaga o‘tishga tayyor. "Nyukasl" ham Kalvinga qiziqish bildirgan.
