“Roma” bosh murabbiyi Joze Mourinyo Yevropa ligasining 6-turida “Sherif”ni mag‘lub etganidan so‘ng, “bo‘rilar”ning guruh bosqichidagi o‘yinini yuqori baholadi.
“Ikkinchi o‘rin uchun o‘zimiz aybdormiz. Biz “Slaviya”ga qarshi bitta dahshatli o‘yin o‘tkazdik, bu esa hammasini barbod qildi. Biz ikkinchi o‘rinni egalladik, ammo Chempionlar ligasidan chiqib ketgan jamoalar bizga qarshi o‘ynashdan xursand bo‘lmaydi”, – dedi portugaliyalik mutaxassis. Murabbiy Pragadagi muvaffaqiyatsizlik uchun jazo pley-offning birinchi bosqichidagi ikkita qo‘shimcha o‘yin bo‘lishini ta’kidladi.
Eslatib o‘tamiz, “Roma” o‘z maydonida 3:0 hisobida g‘alaba qozonib, guruh bosqichini yakunladi. 13 ochko jamg‘argan Rim klubi “Slaviya”, “Servett” va “Sherif” bilan guruhda ikkinchi o‘rinni egalladi.
