Madridning “Real” klubi bosh murabbiyi Karlo Anchelotti yarim himoyachi Toni Kroosning kelasi yozda bo‘lib o‘tadigan Yevropa chempionati uchun Germaniya terma jamoasiga qaytishi haqidagi mish-mishlarga izoh berdi.
"Agar Kroos Germaniya terma jamoasiga qaytsa, jamoa dunyoning eng yaxshi yarim himoyachilaridan biriga ega bo‘lish baxtiga muyassar bo‘ladi" - dedi Anchelotti matbuot anjumanida.
Avvalroq Kroos jamoadoshi Antonio Ryudiger uni Germaniya terma jamoasiga qaytishga ko‘ndirganini tan olgandi.
Eslatib o‘tamiz, Toni 2021 yilgi Yevropa chempionatidan so‘ng xalqaro faoliyatini yakunlashini e’lon qilgan edi. Yarim himoyachining "Real" bilan shartnomasi yozda yakuniga yetadi.
