"Neftchi" PFK bilan shartnoma imzolagan Javohir Qahramonov klub matbuot xizmatiga bergan kichik intervyusini o‘qishingiz mumkin.

— Javohir "Neftchi"ga o‘tish varianti qanday paydo bo‘ldi?
— Meni jamoaga Vitaliy Grigoryevich taklif qilishdi. O‘z oldiga yuksak maqsadlarni qo‘ygan klubda o‘ynash albatta qiziqarli va quvonarlidir. "Neftchi"dek buyuk jamoa safida to‘p surish har qanday futbolchi uchun sharafli hisoblanadi.

— "Neftchi" jamoasiga qarshi o‘tgan mavsumda jizzaxliklar tarkibida maydonga chiqqansiz. Klub sizda qanday taassurotlar qoldirgan?
— Albatta, jamoa o‘tgan mavsumda ancha kuchli o‘yin ko‘rsatdi. Har qanday raqibni yenga oldi va so‘nggi turgacha medallar uchun kurashdi. Mana shu jihatlari ham klubga o‘tishimga turtki bo‘ldi.

— Jamoa bosh murabbiyi haqida qanday fikrlarni bildira olasiz.
— Vitaliy Levchenko xaqida gapiradigan bo‘lsam, o‘tgan mavsumda o‘zining futboldagi qarashlari orqali uncha-muncha klublarni noqulay axvolga sola bildi. Bejizga emas, hozirgi kunda PFL tomonidan Superliganing eng yaxshi uch nafar murabbiyi ro‘yhatidan joy egallaganligi murabbiyning qanday salohiyatga ega ekanligidan dalolat beradi.

— Klub muxlislariga tilaklaringiz?
— O‘ylaymanki, yangi mavsumda jamoa muxlislarini yorqin o‘yinlarimiz orqali xursand qilamiz. Yuksak marralarni zabt etishda esa hamjihatlikda harakat qilsak chempionlikni qo‘lga kiritish yo‘lidagi maqsadimizga erishish osonroq kechadi.

"Neftchi" PFK matbuot xizmati