"Tottenxem" o‘tgan mavsumni juda yomon yakunlagan edi. Kamiga, klub yozda eng yaxshi to‘purari bo‘lgan Xarri Keynni yo‘qotdi. Shunga qaramay, "shporlar" yangi murabbiy qo‘l-ostida 2023/24 yilgi mavsumni fantastik darajada boshladi. Dastlabki 10 ta turda mag‘lubiyatga uchramagan jamoani, "Chelsi" yirik hisobda yer tishlatadi. Postekoglu o‘z rejalarini jarohatlar sababli oxirigacha amalga oshira olmayapti. Tarkibdagi zaif nuqtalar va jarohatlanganlarni o‘rnini to‘ldirish uchun yanvardagi transferlar oynasi yaxshigina imkoniyat taqdim etadi. Quyida londonliklar tomonidan nishonga olinayotgan futbolchilarga nazar tashlaymiz.
Markaziy himoya
Ingliz nashrlarida "Tottenxem" va "Nissa" Jan-Kler Todibo xaridi uchun muzokaralarga kirganini aytadi. Bu transfer 35 million funtga baholanmoqda. 23 yoshli himoyachi jamoasining muhim figuralaridan biri. Ammo arzon narx "Tottenxem"ni sotib olishga undashi turgan gap.
"Everton" yulduzi Ben Godfri keyingi ehtimoliy xaridlar qatorida turibdi. Shon Daych undan yetarlicha foydalangani yo‘q. Shu sababli, Godfri jamoasini yangilashga qarshi bo‘lmasligi aniq. Unga "Brentford" ham da’vogar sanaladi.
Yarim himoya uchun
18 yoshli Artur Vermeren Shimoliy London jamoasida qadrlanadi. Belgiyada yosh yarim himoyachi ajoyib harakatlari bilan ajralib turibdi. "Antverpen" Vermerenni sotish niyati emas. Agar shunday bo‘lgan taqdirda ham, "Tottenxem" uchun uning xaridi oson bo‘lmaydi. Negaki, Vermeren uchun "Arsenal" va "Barselona" ham da’vogarlik qilmoqda.
"Tottenxem"da boshqa variant ham mavjud. "Blekbern Rovers" yulduzi Adam Varton allaqachon APL klubi radariga tushgan. Varton bu mavsumda Chempionshipning eng yorqin vakillaridan biri bo‘lib turibdi.
Hujum uchun
"Kopengagen" hujumchisi Runi Bardagji "MYU" darvozasiga kiritgan g‘alaba golidan keyin Yevropada ko‘p tilga olina boshladi. 18 yoshli futbolchi yanvarda kattaroq klubga o‘tishi kutilmoqda. Runiga "MYU" va "Chelsi" jiddiy qiziqish bildirayotgani aytilgan. Shu sabab bu borada ham "Tottenxem"ga oson bo‘lmaydi.
"Al-Ittihod" vingeri Jota Britaniyaga qaytishi mumkin. "Tottenxem" uni ehtimoliy xaridlar ro‘yxatiga kiritdi. Biroq, portugaliyalik imzosi uchun "Nyukasl" qarshiligi yengib o‘tilishi kerak bo‘ladi.
ISMATOV J.
