"Тоттенхэм" ўтган мавсумни жуда ёмон якунлаган эди. Камига, клуб ёзда энг яхши тўпурари бўлган Харри Кейнни йўқотди. Шунга қарамай, "шпорлар" янги мураббий қўл-остида 2023/24 йилги мавсумни фантастик даражада бошлади. Дастлабки 10 та турда мағлубиятга учрамаган жамоани, "Челси" йирик ҳисобда ер тишлатади. Постекоглу ўз режаларини жароҳатлар сабабли охиригача амалга ошира олмаяпти. Таркибдаги заиф нуқталар ва жароҳатланганларни ўрнини тўлдириш учун январдаги трансферлар ойнаси яхшигина имконият тақдим этади. Қуйида лондонликлар томонидан нишонга олинаётган футболчиларга назар ташлаймиз.
Марказий ҳимоя
Инглиз нашрларида "Тоттенхэм" ва "Ницца" Жан-Клер Тодибо хариди учун музокараларга кирганини айтади. Бу трансфер 35 миллион фунтга баҳоланмоқда. 23 ёшли ҳимоячи жамоасининг муҳим фигураларидан бири. Аммо арзон нарх "Тоттенхэм"ни сотиб олишга ундаши турган гап.
"Эвертон" юлдузи Бен Годфри кейинги эҳтимолий харидлар қаторида турибди. Шон Дайч ундан етарлича фойдалангани йўқ. Шу сабабли, Годфри жамоасини янгилашга қарши бўлмаслиги аниқ. Унга "Брентфорд" ҳам даъвогар саналади.
Ярим ҳимоя учун
18 ёшли Артур Вермерен Шимолий Лондон жамоасида қадрланади. Бельгияда ёш ярим ҳимоячи ажойиб ҳаракатлари билан ажралиб турибди. "Антверпен" Вермеренни сотиш нияти эмас. Агар шундай бўлган тақдирда ҳам, "Тоттенхэм" учун унинг хариди осон бўлмайди. Негаки, Вермерен учун "Арсенал" ва "Барселона" ҳам даъвогарлик қилмоқда.
"Тоттенхэм"да бошқа вариант ҳам мавжуд. "Блэкберн Роверс" юлдузи Адам Вартон аллақачон АПЛ клуби радарига тушган. Вартон бу мавсумда Чемпионшипнинг энг ёрқин вакилларидан бири бўлиб турибди.
Ҳужум учун
"Копенгаген" ҳужумчиси Руни Бардагжи "МЮ" дарвозасига киритган ғалаба голидан кейин Европада кўп тилга олина бошлади. 18 ёшли футболчи январда каттароқ клубга ўтиши кутилмоқда. Рунига "МЮ" ва "Челси" жиддий қизиқиш билдираётгани айтилган. Шу сабаб бу борада ҳам "Тоттенхэм"га осон бўлмайди.
"Ал-Иттиҳод" вингери Жота Британияга қайтиши мумкин. "Тоттенхэм" уни эҳтимолий харидлар рўйхатига киритди. Бироқ, португалиялик имзоси учун "Ньюкасл" қаршилиги енгиб ўтилиши керак бўлади.
ИСМАТОВ Ж.
