Samarqandda bo‘lib o‘tayotgan shaxmat bo‘yicha jahon chempionatida bugun rpaid yo‘nalishi o‘z yakuniga yetdi. Unda Magnus Karlsen g‘oliblikni qo‘lga kiritdi.

Norvegiyalik grossmeyster 13 imkoniyatdan 10 ochko jamg‘ardi. Magnus 12-turda Nodirbek Abdusattorovga qarshi qora donalarda o‘ynab, durang qayd etdi. Abdusattorov esa 9 ochko bilan 11-pog‘onani egalladi. Hamyurtimiz so‘nggi turda Volodar Murzinni mag‘lub etganida 3-o‘rinni egallar edi. Ammo rossiyalik shaxmatchi durang uchun harakat qildi va maqsadiga erishdi. Murzin musobaqani 5-pog‘onada yakunladi.

Ikkinchi o‘rinni Sloveniya vakili Vladimir Fedoseev egalladi — 9,5 ochko. Uchinchi o‘rin esa xitoylik Yu Yangyiga nasib etdi — 9,0 ochko. Hindistonlik Santosh Vidit 4-pog‘onani band etdi.

O‘zbek shaxmatchilari orasida Jahongir Vohidov mukofot beriladigan o‘ringa joylashdi — 30-o‘rin. Jahongir 1500 dollar mukofot puliga ega bo‘ldi. Abdusattorov esa 5000 dollarni qo‘lga kiritdi.

8 ochko jamg‘argan Javohir Sindarov, Shamsiddin Vohidov va Muhiddin Madaminov mos ravishda 38, 41 va 44-o‘rinlarni egallashdi.

Ertaga blits bo‘yicha bahslarga start beriladi.