2022 yilning oxiri Messi uchun ajoyib yakunlandi. Ammo u 2023 yilda o‘z darajasini yo‘qotib bordi. Hozir biz Yevropada na Messini, va na Ronalduni ko‘ra olamiz. Ikkita daho bizni tashlab ketib bo‘ldi. Ularning o‘rnini Mbappe va Xoland egallay boshladi. Ammo ular yolg‘iz emas. Biz 2023 yilda ko‘plab yosh super yulduzlarni kashf etdik. Quyida o‘tgan yilning 21 yoshgacha bo‘lgan eng yaxshilari kim bo‘lganiga e’tibor qaratamiz.
5. Jamal Musiala
Angliya Musialaga ega chiqishi mumkin edi. Ammo bu imkoniyatni Germaniya qo‘lga kiritdi. 20 yoshli yarim himoyachi "Bavariya"ning asosiy tarkib futbolchisiga aylanganiga ancha bo‘ldi. U maydonni ko‘plab o‘rinlarida harakat qila oladi. Hattoki, Tomas Tuxel Keyn bo‘lishiga qaramay, aynan Musialani "Bavariya"ning eng muhim vakili deb hisoblashini bildirgan edi. Joriy mavsumda Musiala jarohatlardan aziyat chekmoqda. Shunga qaramay, uning oldida hali uzoq va yorqin kelajak mavjud.
4. Gavi
Gavi yarim himoyachi. Pedri bilan bir pozisiyada o‘ynagani sababli ham uning nomi soya ostida qolgandek tuyulmoqda. "Las-Palmas" akademiyasidan chiqqan bolakay 2021 yildayoq yarq etib ko‘zga tashlangan edi. U hozirga qadar ajoyib harakat qilib keldi. Ammo, dekabrda tizzasidan jarohat olgan futbolchining maydonga qaytishi katta so‘roq ostida qolmoqda. Gavi "Barselona" va Ispaniya terma jamoasida juda muhim o‘ringa ega edi. Endi undan qoladigan bo‘shliqni to‘ldirish oson kechmaydi.
3. Bukayo Saka
Mikel Arteta Sakadan 2023 yil davomida uzluksiz ravishda barcha o‘yinlarda foydalanib keldi. Negaki, u jamoadagi eng samarali futbolchi edi. Joriy mavsumda Bukayo unchalik ham ko‘zga tashlangani yo‘q. Shunga qaramay, u barcha musobaqalarda klub va mamlakati uchun 26 ta o‘yinda, jami 21 ta golda ishtirok etdi. Sakaga ko‘p narsa bog‘liq ekanini ko‘rdik. U yaxshi sport formasida bo‘lmas ekan, "Arsenal" o‘z maqsadiga yetisha olmaydi.
2. Florian Virs
Bir yil tizzasining xochsimon paylarini davolagan futbolchi, 2023 yildan yana ishga kirishdi. Virs bu mavsumda fantastik daraja namoyish etmoqda. U Bundesliganing Keyn bilan birga eng yaxshi vakili bo‘lib turibdi. 21 yoshli futbolchi "Bayer Leverkuzen"ni Germaniya chempionligi tomon yetaklashi mumkin bo‘lgan inson sifatida qaralmoqda. Virs 2023 yilda o‘rtacha har 108 daqiqada bitta golga mualliflik qildi. U yosh va butun nemis millati undan katta narsalarni umid qilmoqda.
1. Jud Bellingem
Bellingemning "Birmingem Siti"dagi raqami allaqachon muzeyda saqlanmoqda. Bu bekorga emas, albatta. O‘tgan mavsumni "Borussiya Dortmund"da yuqori notada tugata olgandan futbolchi, "Real"ga yo‘l oldi. U Madridda ham o‘z qobiliyatini ajoyib ravishda namoyish etib kelmoqda. U sababli Anchelotti jamoasi La-liga yetakchisi. Bellingem esa 2023 yilni turnir to‘purarlari qatorida yakunladi.
O‘tgan yil Judniki edi deya bemalol aytish mumkin.
ISMATOV J.
