Jordan Xenderson faoliyatini Yevropada davom ettirmoqchi.
O‘tgan yozda "Al-Ittifoq"ga o‘tgan angliyalik yarim himoyachi Saudiya Arabistoni chempionatini tark etmoqchi ekani avvalroq xabar qilingandi. Xenderson iqlim va o‘yinlarga tashrif buyuruvchilarning kamligidan norozi, shuningdek, Yevro-2024da o‘ynash imkoniyatini oshirmoqchi.
TalkSport xabariga ko‘ra, Xenderson xizmatlari "Bavariya" va "Bayer"ga taklif qilingan. Uning nomzodi "Yuventus" va bir qator Premyer-liga klublarida ham muhokama qilinmoqda.
Qayd etilishicha, hozirda Xenderson transfer bo‘yicha rasmiy so‘rov yubormagan. “Al-Ittifoq” yarim himoyachi bilan xayrlashmoqchi emas, bosh murabbiy Stiven Jerrard hamon jamoani angliyalik atrofida qurishga harakat qilmoqda. Xendersonning katta maoshi tufayli ijara varianti dargumon, aksariyat klublar uni to‘lashga qurbi yetmaydi.