"Chelsi" yarim himoyachisi Koul Palmer Maurisio Pochettino uni Anxel di Mariyaga o‘xshatgani haqidagi so‘zlariga izoh berdi.

“Ko‘klar” bosh murabbiyi ingliz futbolchisi o‘z o‘yin uslubida unga Di Mariyani eslatishini bir necha bor ta’kidlagan.

Pochettino yaqinda yana futbolchilarni solishtirib, Palmer kelajakda argentinalik yulduz darajasiga chiqishi mumkinligini aytdi.

"Di Mariya aql bovar qilmas o‘yinchi. Albatta, bunday taqqoslash qimmatli iltifot, lekin men hali ham bu darajadan uzoqdaman", - deya 21 yoshli hujumkor yarim himoyachining so‘zlarini keltiradi Sky Sports.

Koul Palmer 2023 yilning yozida «Manchester Siti»dan «Chelsi»ga o‘tgan edi. Futbolchi londonliklar safida 23 ta o‘yinda maydonga tushib, o‘nta gol urdi va yettita golli uzatmani amalga oshirdi.