Angliya Premyer-ligasining bir qancha jamoalari “Vest Xem” hujumchisi Muhammad Said Benrahmani o‘z jamoasida ko‘rishni istamoqda. Bu haqda jurnalist Santi Una ijtimoiy tarmoqda xabar berdi.
Manbaning xabariga ko‘ra, joriy qishki transfer oynasida forvardni sotib olishga "Brentford" klubi qiziqmoqda. “Fulxem” va “Vulverxempton” ham 28 yoshli futbolchi uchun kurashishga tayyor.
Qayd etilishicha, Angliya klublari jazoirlik futbolchiga qiziqish bildirayotganiga qaramay, "Vest Xem" "Lion" bilan ijara bo‘yicha muzokaralarni davom ettirmoqda.
Benrahma 2020 yildan beri "Vest Xem"da o‘ynab kelmoqda. Joriy mavsumda forvard "bolg‘achilar" safida barcha turnirlarda 21 o‘yin o‘tkazib, ikkita golli uzatmani amalga oshirdi. Futbolchining London klubi bilan shartnomasi 2026 yilning iyun oyi oxirigacha amal qiladi. Transfermarkt portali ma’lumotiga ko‘ra, futbolchining taxminiy narxi 22 million yevroni tashkil qiladi.
