Serbiyalik yarim himoyachi Nemanya Matich katta ehtimol bilan "Renn"da qoladi. Bu haqda L'Equipe nashri xabar bermoqda. Eslatib o‘tamiz, o‘tgan hafta futbolchi Fransiya jamoasi rahbariyati bilan janjallashib qolgan, shundan so‘ng u mashg‘ulotlarni qoldirib, Londonga qaytishga qaror qilgandi.
Manbaga ko‘ra, 35 yoshli yarim himoyachi 15 yanvar, dushanba kuni yana bir bor "Renn" rahbariyatidan shartnomani bekor qilishni so‘ragan, biroq qat’iy rad javobini olgan. Qayd etilishicha, "Lion" serbiyalik futbolchi bilan shartnoma imzolashga tayyor.
Matich avgust oyida "Roma"dan 2,5 million yevro evaziga "Renn" futbolchisiga aylandi. Joriy mavsumda yarim himoyachi barcha turnirlarda 19ta o‘yin o‘tkazib, ikkita golli uzatmani amalga oshirdi. Futbolchining amaldagi klubi bilan shartnomasi 2025 yilning iyun oyi oxirigacha amal qiladi.
Oldinroq Matichning "Roma"ga qaytish niyati borligi haqida xabar berilgandi.
