Сербиялик ярим ҳимоячи Неманья Матич катта эҳтимол билан "Ренн"да қолади. Бу ҳақда L'Equipe нашри хабар бермоқда. Эслатиб ўтамиз, ўтган ҳафта футболчи Франция жамоаси раҳбарияти билан жанжаллашиб қолган, шундан сўнг у машғулотларни қолдириб, Лондонга қайтишга қарор қилганди.

Манбага кўра, 35 ёшли ярим ҳимоячи 15 январь, душанба куни яна бир бор "Ренн" раҳбариятидан шартномани бекор қилишни сўраган, бироқ қатъий рад жавобини олган. Қайд этилишича, "Лион" сербиялик футболчи билан шартнома имзолашга тайёр.

Матич август ойида "Рома"дан 2,5 миллион евро эвазига "Ренн" футболчисига айланди. Жорий мавсумда ярим ҳимоячи барча турнирларда 19та ўйин ўтказиб, иккита голли узатмани амалга оширди. Футболчининг амалдаги клуби билан шартномаси 2025 йилнинг июнь ойи охиригача амал қилади.

Олдинроқ Матичнинг "Рома"га қайтиш нияти борлиги ҳақида хабар берилганди.