Italiyaning amaldagi chempioni - «Napoli» joriy mavsum sira o‘ziga o‘xshamayapti.

O‘zi Neapol jamoasida nimalar bo‘l-yapti? Tarkibi binoiydek jamoa yangi bosh murabbiy Valter Massari boshqaruvidagi 10ta o‘yindan 6tasida mag‘lublikni tan oldi. Boz ustiga, oxirgi 4ta uchrashuvning umumiy hisobi chempion uchun sharmandali va kulguli ko‘rinish oldi - 0:9. O‘tgan mavsum duch kelgan raqib ta’zirini bergan «Napoli» hozir «A» seriya turnir jadvalining 9-qatorida. Jamoa kamiga Italiya kubogida ham kurashdan chiqdi.

«Napoli» 7 yanvar kuni «A» seriya 19-turidan o‘rin olgan o‘yinni Turinda «Torino»ga qarshi o‘tkazdi va ortda 0:3 hisobidagi mag‘lubiyat bilan qaytdi. Italiya futboli tarixida amaldagi chempionning birinchi davrani atigi 9-o‘rinda yakunlashi anchadan buyon kuzatilgan emasdi. Tabiiyki, hozirgi salbiy natijalar o‘zgacha fikrlashi va ish tutishi bilan ajralib turadigan klub prezidenti Aurelio di Laurentisni keskin choralar ko‘rishga undamoqda. Italiya matbuotidagi xabarlarga qarasak, oxirgi mag‘lubiyatdan so‘ng «Napoli» o‘ziga xos karantinga olindi. Aniqrog‘i futbolchilar ma’lum vaqt klub bazasidan tashqariga chiqishmaydi va kuchaytirilgan rejimda mashg‘ulot o‘tkazishadi.

«Napoli» sport direktori Mauro Meluso jamoa bazada qolishini tan oldi.

Xullas, futbolchilar haftaning katta qismini yopiq eshiklar ortida o‘tkazishadi. To‘g‘ri, La Gazette dello Sport xabariga qaraganda, «Napoli» rahyubariyati futbolchilarni baza emas, balki Neapoldagi Serapide mehmonxonasida qoldirishga qaror qilgan. Jamoa necha kunga «qamalgani» aniq emas. Taxmin qilinishicha, futbolchilar 14 yanvar kuniga belgilangan «Salernitana» bilan o‘yingacha qadar shu rejimda ishlashadi.