"Roma"ning chap qanot himoyachisi Leonardo Spinassola jamoaning yangi bosh murabbiyi Daniele de Rossi haqida fikr bildirdi.
Italiyalik mutaxassis hafta boshida ishdan bo‘shatilgan Joze Mourinyo o‘rniga "bo‘rilar" bosh murabbiyi etib tayinlandi.
"Men Daniele bilan o‘ynash baxtiga muyassar bo‘lganman, keyinroq u bilan Yevro-2020da terma jamoa murabbiylar shtabida bo‘lganida tanishganman. U o‘zi futbol o‘ynaganida ham murabbiyga o‘xshardi. De Rossi - buyuk inson, u ko‘p narsalarni boshdan kechirgan.
Mourinyoning ishdan bo‘shatilishi to‘g‘ri qarormi? Bilmayman, qarorlarni klub qabul qiladi, biz har doim Mourinyo qo‘l ostida 100 foiz borimizni berganmiz. Natijalar muhim va umid qilamanki, ular yaxshilanadi ”, dedi Spinassola.
De Rossi boshchiligidagi debyut uchrashuvida “Roma” “Verona”ni 2:1 hisobida mag‘lub etdi.
