Ayni paytda Turkiyada o‘quv-mashg‘ulot yig‘inini olib borayotgan «Navbahor» bugun Rossiya Premyer-ligasi vakili “Orenburg” (Orenburg)ga qarshi  navbatdagi nazorat bahsini o‘tkazdi.

Mazkur o‘yinda “Navbahor” bosh murabbiyi Samvel Babayan maydonga quyidagi futbolchilarni maydonga tushirdi:

Aleksandr Lobanov, Azimjon Ahmedov, Ibrohim Yo‘ldoshev, Siyavash Haqnazari, Ruslanbek Jiyanov, Filip Ivanovich, Abrorbek Ismoilov, Yovan Jokich, Toma Tabatadze, Asadbek Sobirjonov, Alijon Alijonov.

Zaxiradan maydonga tushganlar: Muhammadaziz Ibragimov, Navro‘zbek Iminjonov, Davronbek Olimjonov.

Ushbu bellashuvda jangovar durang – 2:2 hisobi qayd etildi.

Ta’kidlash joizki, “lochinlar” tanaffusga 42-daqiqada Ibrohim Yo‘ldoshevning 25 metrlar chamasi uzoqlikdan yo‘llagan aniq zarbasi evaziga 1:0 hisobidagi g‘alaba bilan chiqib ketishgandi.

Uchrashuvning 62-daqiqasida esa orenburgliklar o‘z jarima maydonchasi ichida Ruslanbek Jiyanovga nisbatan o‘yin qoidasini buzishdi. Belgilangan penaltini jamoamizning gruziyalik hujumchisi Toma Tabatadze aniq amalga oshirgan holda, hisobni 2:0 ga yetkazdi.

Biroq bellashuvning so‘nggi daqiqasi va hakam tomonidan qo‘shib berilgan daqiqalari davom etayotgan vaqtda “Orenburg” futbolchilari - Kirill Kaplenko hamda Danila Proxinlarning gollari evaziga yakuniy hisob 2:2 ko‘rinish oldi.

“Navbahor” Turkiya yig‘ini doirasidagi navbatdagi nazorat uchrashuvini 27 yanvar kuni Bolgariyaning “Spartak” (Varna) jamoasiga qarshi o‘tkazadi.

“Navbahor” PFK matbuot xizmati.