Bugun "El Golaso" futbol akademiyasi majlislar zalida "Metallurg" PFKning kengaytirilgan yig‘ilishi bo‘lib o‘tdi. Yig‘ilishda klub rahbariyati, jamoalar, akademiya, stadion ma’muriyati, barcha tizim rahbarlari hamda mas’ul xodimlari ishtirok etishdi.

Klub bosh direktori Shavkat Saidov bir kun muqaddam O‘FAda bo‘lib o‘tgan yig‘ilishda ko‘tarilgan masalalar yuzasidan ma’lumot berarkan, klublar faoliyati, infratuzilmasi hamda moliyaviy hisobotlari bo‘yicha yo‘l qo‘yilgan kamchilik va nuqsonlar jiddiy tanqid ostiga olinganligini e’tirof etdi.

O‘FA yig‘ilishidan kelib chiqqan holda "Metallurg" futbol klubida ham barcha tizimlar o‘z ishlariga yanada mas’uliyat bilan yondoshishlari, qonun ustuvorligiga qat’iy amal qilish, shaffoflik, to‘g‘rilik hamda halollikka rioya etib, tartib-intizom, nazoratning kuchaytirilishi zarurligi uqtirildi.

Futbol klubi tizimidagi barcha yo‘nalishlar – asosiy tarkib, o‘rinbosarlar, yoshlar jamoalari, akademiya, ayollar futboli, futzal yo‘nalishi oldiga qo‘yilgan talablar tahlil etib berildi. O‘FA tomonidan kelishilgan o‘yinlarga qarshi keskin va ayovsiz kurash davom ettirilishi ma’lum qilinib, "Metallurg" futbol klubida ham bu masalalarga jiddiy yondoshish zarurligi ta’kidlandi.

Ortda qolgan mavsum yakunlari bo‘yicha yo‘l qo‘yilgan kamchiliklar, nuqsonlar jiddiy tanqid qilindi. Hisobotchilar bo‘limi, kadrlar bo‘limi, marketing bo‘limi, hamda jamoa adminstratorlari jiddiy ogohlantirildi.

Yig‘ilish so‘ngida klub tizimidagi barcha jamoa murabbiylariga yosh, iqtidorli futbolchilarga yanada ko‘proq e’tibor qaratish, o‘yin amaliyoti bilan doimiy ta’minlash, O‘zbekiston yoshlar terma jamoalariga munosib kadrlar yetkazib berishda jonbozlik ko‘rsatish muhimligi aytildi.