"Chelsi" va Ispaniya terma jamoasining sobiq hujumchisi Diyego Kosta "Palmeyras" futbolchisiga aylanishi mumkin. Bu haqda jurnalist Fabrisio Romano xabar berdi.
Manba bergan xabarga ko‘ra, Braziliya klubi vakillari so‘nggi kunlarda 35 yoshli futbolchi bilan shartnoma borasida faol muzokaralar olib borishgan. Ayni damda forvard erkin agent hisoblanadi.
Eslatib o‘tamiz, Kosta "Chelsi"da uch yarim yil o‘ynagan. Bu vaqt ichida ispaniyalik forvard "ko‘klar" bilan uchta sovrinni qo‘lga kiritdi.
Hujumchining so‘nggi jamoasi "Botafogo" bo‘ldi. O‘tgan mavsumda Kosta barcha musobaqalarda 15 ta o‘yin o‘tkazib, 3 ta gol urgan. Futbolchining klub bilan shartnomasi shu yilning 1 yanvarida yakuniga yetgan. Tomonlar hamkorlikni uzaytirmaslikka qaror qilishdi. Transfermarkt portaliga ko‘ra futbolchining taxminiy narxi 1,6 million yevroni tashkil qiladi.
