"Челси" ва Испания терма жамоасининг собиқ ҳужумчиси Диего Коста "Палмейрас" футболчисига айланиши мумкин. Бу ҳақда журналист Фабрицио Романо хабар берди.
Манба берган хабарга кўра, Бразилия клуби вакиллари сўнгги кунларда 35 ёшли футболчи билан шартнома борасида фаол музокаралар олиб боришган. Айни дамда форвард эркин агент ҳисобланади.
Эслатиб ўтамиз, Коста "Челси"да уч ярим йил ўйнаган. Бу вақт ичида испаниялик форвард "кўклар" билан учта совринни қўлга киритди.
Ҳужумчининг сўнгги жамоаси "Ботафого" бўлди. Ўтган мавсумда Коста барча мусобақаларда 15 та ўйин ўтказиб, 3 та гол урган. Футболчининг клуб билан шартномаси шу йилнинг 1 январида якунига етган. Томонлар ҳамкорликни узайтирмасликка қарор қилишди. Transfermarkt порталига кўра футболчининг тахминий нархи 1,6 миллион еврони ташкил қилади.
