Qatar mezbonligida o‘tgan Osiyo Kubogi nihoyasiga yetdi. Musobaqa finalida mezbon Qatar Iordaniyaga qarshi "Lusail Iconic Stadium"da maydonga chiqib, 3:1 hisobida g‘alabaga erishdi.
Birinchi bo‘limning 22-daqiqasida Akrom Afif jarima maydoniga kirib borayotganda chalib yiqitildi. 11 metrlik jarima zarbasini esa jabrlanuvchining o‘zi gol bilan yakunlab hisobni ochdi. Taym yakuniga qadar Iordaniya deyarli raqib darvozasi oldida xavfli hujum tashkil qila olmadi.
Ikkinchi bo‘limda esa o‘z-o‘zidan hisobda ortda qolayotgan iordaniyaliklar faollikni oshirdi. Hujumlarning birida 67-daqiqada o‘ng qanotdan to‘p jarima maydoniga yetkazib berildi, Yazan Al-Naymat uni ajoyib tarzda to‘xtatib olib, darvozaning yuqori to‘qqizligiga joylab qo‘ydi. Shu tariqa o‘yinda hisob tenglashdi - 1:1. Goldan so‘ng darhol yana mezbonlar oldinga o‘tishdi va yana penalti ishlab olishdi. Bu safar ham Afif undan unumli foydalanib hisobni Qatar foydasiga oshirdi. Uchrashuv bosh hakami Ma Ning ikkinchi bo‘limga 13 daqiqa vaqt qo‘shib berdi. Aynan qo‘shib berilgan daqiqalarning 3-sida Afif darvozabon bilan bir-bir vaziyatga chiqib borayotganda kiper uni to‘xtatib qoldi, xitoylik referi esa VAR yordamida uchinichi penaltini belgiladi. Afif yana to‘p oldiga yaqinlashdi va darvozabonni aldab o‘yinga so‘nggi nuqtani qo‘ydi - 3:1.
Ushbu bahsda xet-trik qayd etgan Afif 8 ta gol bilan turnir to‘purari bo‘ldi. Ikkinchi o‘rindagi Iroq hujumchisi Ayman Hussayn hisobida 6 ta gol bor.
Osiyo kubogi-2023, FINAL
Iordaniya – Qatar 1:3
10 fevral, 20.00, «Lusail Iconic Stadium»
Gollar: 0:1 – 22, penalti Afif, 1:1 – 67 Al-Naymat, 1:2 – 73, penalti Afif, 1:3 – 90, penalti Afif.
Iordaniya – Abu-Layla, Haddad, Al-Adjalin, Abu-Arab, Nasib, Al-Mardi (Rateb, 80), Al-Ravabde, Al-Rashdan, Al-Tamari, Olvan (Hammad, 90), Al-Naymat.
Qatar – Barsham, Salmon, Lukas Mendes, Ali (Huhi, 81), Abdulvahob, Gaber (Assadulla, 53), Fataxi, Afif, Abdurazzoq (Muhammad, 63), Al-Haydos (Hatem, 53), Ali Almoyez.
Ogohlantirishlar: Olvan (18), Al-Adjalin (45), Al-Naymat (86), Abu-Layla (90) Barsham (90).
