Himoyachi Matteys de Ligt yozgi transfer oynasida “Bavariya”ni tark etishi mumkin. Sky Germany xabariga ko‘ra, 24 yoshli niderlandiyalik futbolchi vaziyatdan 100 foiz mamnun emas. De Ligt jamoani o‘zgartirishi mumkin va myunxenliklar jamoasi bosh murabbiyi Tomas Tuxel "Barselona"dan Ronald Arauxoga qiziqishda davom etmoqda.

Qayd etilishicha, Bundesliganing “Bayer”ga qarshi o‘yini (0:3) “Bavariya”da de Ligt asosiy tarkibda mustahkam o‘yinchi sifatida qaralmasligini yana bir bor ko‘rsatdi. Leverkuzenda niderlandiyalik futbolchi butun 90 daqiqa davomida zaxira o‘rindig‘ida o‘tirdi.

Transfermarkt portali ekspertlari Matteys de Ligtni 65 million yevroga baholamoqda. Futbolchining "Bavariya" bilan shartnomasi 2027 yilning o‘rtalariga qadar mo‘ljallangan.