Germaniyada Fisher nomidagi Freestyle Chess G.O.A.T Challenge shaxmat turnirida davraviy tizim yakuniga yetib, kecha pley-off bosqichiga start berildi.

Shaxmatchilar saralash bosqichida rapid tizimida o‘zaro bir martadan o‘ynab chiqishgan bo‘lsa, pley-off klassik formatda o‘tkazilmoqda.

Nodirbek Abdusattorov chorak finalda amaldagi shaxmat toji sohibi xitoylik Ding Lirenga qarshi oq donalarda o‘ynadi. Uch soatdan ko‘proq davom etgan o‘yinda Liren 37-yurishga kelib mag‘lubiyatini tan oldi. Xitoylik sportchi o‘yin boshida bir piyodani berib qo‘ydi. Hamyurtimiz mazkur kichik ustunlikni mahorat bilan g‘alabaga aylantirdi.

Bugun shaxmatchilar ikkinchi partiyani o‘ynashadi. Nodirbek bu safar qora donalarda o‘ynaydi. Vatandoshimiz durang o‘ynasa ham yarim finalga chiqadi. Yarim finalda bu juftlik g‘olibiga Alirizo Feruja (Fransiya) - Magnus Karlsen (Norvegiya) juftligi g‘olibi ro‘baro‘ keladi.

Bugungi uchrashuvlar Toshkent vaqti bilan 17:00da boshlanadi.

Chorak finalning birinchi o‘yinida qayd etilgan natijalar:

Nodirbek Abdusattorov (O‘zbekiston) - Ding Liren (Xitoy) - 1:0
Vinsent Keymer (Germaniya) - Levon Aronian (AQSH) - 0,5:0,5
Fabiano Karuana (AQSH) - Domaradju Gukesh (Hindiston) - 1:0
Alirizo Feruja (Fransiya) - Magnus Karlsen (Norvegiya) - 1:0