Германияда Фишер номидаги Freestyle Chess G.O.A.T Challenge шахмат турнирида давравий тизим якунига етиб, кеча плей-офф босқичига старт берилди.
Шахматчилар саралаш босқичида рапид тизимида ўзаро бир мартадан ўйнаб чиқишган бўлса, плей-офф классик форматда ўтказилмоқда.
Нодирбек Абдусатторов чорак финалда амалдаги шахмат тожи соҳиби хитойлик Динг Лиренга қарши оқ доналарда ўйнади. Уч соатдан кўпроқ давом этган ўйинда Лирен 37-юришга келиб мағлубиятини тан олди. Хитойлик спортчи ўйин бошида бир пиёдани бериб қўйди. Ҳамюртимиз мазкур кичик устунликни маҳорат билан ғалабага айлантирди.
Бугун шахматчилар иккинчи партияни ўйнашади. Нодирбек бу сафар қора доналарда ўйнайди. Ватандошимиз дуранг ўйнаса ҳам ярим финалга чиқади. Ярим финалда бу жуфтлик ғолибига Алиризо Феружа (Франция) - Магнус Карлсен (Норвегия) жуфтлиги ғолиби рўбарў келади.
Бугунги учрашувлар Тошкент вақти билан 17:00да бошланади.
Чорак финалнинг биринчи ўйинида қайд этилган натижалар:
Нодирбек Абдусатторов (Ўзбекистон) - Динг Лирен (Хитой) - 1:0
Винсент Кеймер (Германия) - Левон Арониан (АҚШ) - 0,5:0,5
Фабиано Каруана (АҚШ) - Домараджу Гукеш (Ҳиндистон) - 1:0
Алиризо Феружа (Франция) - Магнус Карлсен (Норвегия) - 1:0
