Joriy yilning 14-centyabr – 6 oktyabr kunlari mamlakatimiz futzal bo‘yicha Jahon chempionatiga mezbonlik qiladi. Toshkent, Andijon va Buxoro shaharlarida o‘tkaziladigan bu galgi turnir FIFA tomonidan 10-bor tashkil etilmoqda. Final bosqichida jami 24 jamoa g‘oliblik uchun bahs olib boradi.

Hozirga qadar mezbon O‘zbekistondan tashqari yana 10 ta terma jamoa Mundial yo‘llanmasini qo‘lga kiritgan, bular – Braziliya, Argentina, Venesuela, Paragvay, Portugaliya, Ispaniya, Qozog‘iston, Fransiya, Ukraina va Yangi Zelandiya.

Ilk musobaqa 1989 yilda Niderlandiyada bo‘lib o‘tgan va unda Braziliya terma jamoasi chempionlikni qo‘lga kiritgan.

Amaldagi chempion Portugaliya bo‘lib, jamoa 2021 yilgi turnir finalida Argentinani mag‘lub etgan. Hozirga qadar 4 jamoa mundialda zafar quchgan – Braziliya (5 marta), Ispaniya (2 marta), Argentina (1 marta) va Portugaliya (1 marta). Mezbon terma jamoalar orasida faqatgina Braziliya (2008) o‘z uyida o‘tgan turnirda g‘olib bo‘lishning uddasidan chiqqan.

Turnir tarixidagi eng yaxshi to‘purar braziliyalik Falkao bo‘lib, u 33 uchrashuvda 48 bor raqiblar darvozasini ishg‘ol qilgan.