«Nasaf» bosh murabbiyi Ro‘ziqul Berdiyev Osiyo chempionlar ligasi nimchorak final bosqichi doirasida bo‘lib o‘tgan «Al-Ayn»ga qarshi o‘yindan keyin matbuot anjumanida ishtirok etdi.

— Og‘ir o‘yin bo‘ldi. Raqib jiddiy edi. Uning hujumda qanday harakat qilishini o‘zingiz ham ko‘rdingiz. Shuni bilgan holda bugun ehtiyotkor bo‘lib, himoyaga e’tibor qaratib o‘ynadik. Agar raqibga bosim o‘tkazish maqsadida ko‘p harakat qilganimizda ertaroq charchab qolardik. Shuning uchun ehtiyot bo‘lgan holda raqibning kuchli hujumchilariga qarshilik ko‘rsatishga urindik. Natija biz kutgandek bo‘lmadi, ammo bu mavsumdagi ilk rasmiy o‘yini ekanini inobatga olsak, jamoamizning ayni paytda qanday tayyorgarlikka ega ekanini bilib oldik.

Bugungi o‘yinda futbolchilar turli holatda kelgani ham natijaga ta’sir ko‘rsatdi. Barcha futbolchilar birgalikda kam mashg‘ulot o‘tkazdik. Jarohatdan forig‘ bo‘lgan o‘yinchilar hali yaxshi formaga kirishga ulgurmadi.

— Sharof Muhitdinovning almashtirilishi majburiy bo‘ldimi?
— Yo‘q, bu majburiy emas, taktik almashtirish edi. Hujumkorlikni oshirish maqsadida, Nasrullayev kam mashg‘ulot o‘tkazgan bo‘lsa-da, uni maydonga tushirishga qaror qildim. Sherzod ko‘p mashg‘ulotlarni o‘tkazib yuborgani bugungi o‘yinda sezildi.

— O‘yinning qaysi pallasida futbolchilar charchab qolganini sezdingiz?
— Futbolchilarning qanday tayyorgarlikka ekanini bilamiz. Qaysi o‘yinchi mashg‘ulotlarda to‘liq ishtirok etayotgani, qaysi futbolchi mashg‘ulotda ishtirok etmayotganidan xabarimiz bor. Shuning uchun har bir futbolchining jismoniy tayyorgarligiga e’tibor qaratyotgandik. Shundan kelib chiqib charchagan futbolchilarni zaxiraga oldik. Raqibning kuchi va futbolchilarimizning hozirgi holatidan kelib chiqib ushbu tarkib va taktikani tanladik. Eng oxirgi vaziyatni inobatga olmasa, yigitlar konsentrasiyani yo‘qotmagan holda o‘ynashayotgandi. Ha, hujumda muammolarimiz ko‘rindi. Temur va Oybek Bobur Abduxoliqov bilan birga bir haftadan davomida shug‘ullanishdi. Bir haftada hammasi yaxshi bo‘lib ketmaydi.