"Inter" yarim himoyachisi Nikolo Barella qishda "Manchester Siti"ga o‘tish taklifini rad etdi. Bu haqda Football Italia xabar bermoqda.
Manbaga ko‘ra, yanvar oyining so‘nggi haftasida “shaharliklar” ustozi Pep Gvardiola italiyalik futbolchi haqida surishtiruv o‘tkazgan, biroq Barella darhol uning Angliyaga ko‘chib o‘tishga qiziqmasligini ma’lum qilgan. Biroz vaqt o‘tgach, 27 yoshli yarim himoyachi "Inter" rahbariyatini amaldagi shartnomani uzaytirishga tayyorligi haqida ma’lum qildi.
Joriy mavsumda Barella “Inter” safida 31 ta o‘yinda maydonga tushib, 2 ta gol urdi va 5 ta golli uzatmani amalga oshirdi. Transfermarkt portali Italiya terma jamoasi futbolchisini 75 million yevroga baholamoqda.
