FIFA rasmiy sayti futbol bo‘yicha Olimpiada o‘yinlariga qur’a tashlash marosimi haqida ma’lumot berdi.
Qur’a tashlash marosimi 20 mart, chorshanba kuni Parijda bo‘lib o‘tadi. Erkaklar o‘rtasidagi futbol turniriga to‘xtaladigan bo‘lsak, Fransiya, AQSH, Dominikan Respublikasi, Ispaniya, Isroil, Ukraina, Marokash, Misr, Mali, Yangi Zelandiya, Paragvay va Argentina terma jamoalari Olimpiada yo‘llanmasini qo‘lga kiritishgan.
Keyinroq yana to‘rtta yo‘llanma o‘ynaladi. 2024 yilgi Olimpiada o‘yinlarining erkaklar o‘rtasidagi futbol turnirida 16 ta, ayollar o‘rtasida esa 12 ta jamoa ishtirok etadi.
Avvalroq matbuotda Kilian Mbappe o‘z uyidagi Olimpiadada ishtirok etishni xohlayotgani haqida yozgan edi. Turnirda har bir jamoa 23 yoshdan oshgan 3 nafar futbolchini kiritishi mumkin.
