“Andijon”ning joriy yilgi transfer siyosati iqtidorli, kelajagi bor bo‘lgan o‘yinchilarni jalb etishga ham qaratilgan va seleksiyada ushbu jihatga ham alohida e’tibor qaratildi.

Bunga misol tariqasida Rustam Turdimurodovni tilga olish mumkin. O‘tgan yili Belarusning “Energetik-BGU” jamoasida to‘p surgan hujumchi “Paxtakor” klubi tarbiyalanuvchisi hisoblanadi.

Qolaversa, u o‘tgan yili Argentinada o‘tgan U20 jahon chempionatida ham terma jamoamiz sharafini himoya qilgan. Bu esa uning iqtidoridan darak.

Hozirda 19 yoshda, bir necha oydan so‘ng 20 yoshni qarshilaydi. Tirishqoq va mehnatkash futbolchining faoliyatida endi yangi sahifa ochilmoqda. Futbolchi klub matbuot xizmatiga o‘zi va yangi maqsadlari haqida gapirdi.

-Rustam “Andijon” klubiga xush kelibsiz! Avvalo, futbolga kirib kelishingiz qanday yuz bergan, kim sababchi bo‘lgan?

-Avvalambor, Andijon ahliga va jamoa muxlislariga Assalamu alaykum! Futbolga kirib kelishimga oilam, ko‘proq dadam sababchi bo‘lgan. Dadam professional futbolchi bo‘lishni istagan, lekin bu nasib qilmagan. Shuning uchun meni futbolchi bo‘lishimni istaganlar.

-Faoliyatingizning boshlanishi qanday yuz bergan?

-Birinchi murabbiyim (Rahmatli – Sarvar aka Sharipov, ukasi Sherzod aka Sharipov) yordamida “Paxtakor” akademiyasiga o‘tdim. U yerda Olim aka Shokirov tarbiyasini oldim. Aynan Olim aka Shokirov yordamida “Paxtakor” U19, U21 va asosiy tarkibga chiqdim .

-“Andijon” jamoasiga ko‘chib o‘tdingiz. Bu taklifni ilk bor eshitganingizda qanday reaksiya bildirdingiz?

-Reaksiya ajoyib va ijobiy tarzda bo‘ldi. O‘zim ham taklifni eshitib, xursand bo‘ldim.

-“Andijon”da o‘z oldingizga qanday maqsad qo‘ydingiz?

-Albatta, jamoamga yordam berish. Buning uchun bor imkoniyatimni ishga solaman.

-Hujumchi sifatida nechta gol urishni mo‘ljallayapsiz?

-Hali Superligada debyut golimni urmadim. Ammo “Andijon”da gollar urib muxlislarning qalbidan joy olmoqchiman. Xudo xohlasa, qancha imkonyat bo‘lsa, shundan foydalanib, ko‘proq gol urishga harakat qilaman.