Avstraliya ayollar terma jamoasi bosh murabbiyi Toni Gustavsson va himoyachisi Alanna Kennedi kecha bo‘lib o‘tgan matbuot anjumanida ishtirok etib, O‘zbekistonga qashi o‘yin oldidan o‘z fikrlarini bildirib o‘tdi.

"Besh kunlik yig‘inimizdan keyin futbolchilar jismoniy va ruhiy jihatdan yaxshi holatda. Jamoaning bugungi mashg‘ulotida bunga yana bir marta amin bo‘ldik. Shunday ekan, ertangi o‘yin oldidan hissiyotlarim juda yaxshi.

Shuni aytishim mumkinki, futolchilar maydonga chiqqanida ularga ob-havoning sovuqligi ta’si ko‘rsatmaydi. Avval ular turli iqlim sharoitlarida o‘ynashgan. Murabbiylar shtabida ilmiy va tibbiy xodimlar borki, ular futbolchilarning sharoitga moslashishi uchun katta hajmdagi ishni amalga oshirmoqda. Shunday ekan, biz o‘yinga yaxshi tayyorlangan holatda bo‘lamiz.

Ikkita o‘yinning orasi yaqinligiga to‘xtaladigan bo‘lsam, biz bunga ko‘nikkanmiz. Avstraliyaga qaytganimizdan keyin imkon qadar futbolchilarni javob o‘yiniga tayyorlashga harakat qilamiz. Bundan tashqari, muxlislar bilan to‘la stadionda o‘ynash shogirdlarimga kuch beradi", — dedi murabbiy.

"O‘zbekiston yaxshi saviyadagi jamoa. Biz ularni hurmat qilamiz. Eng muhimi biz o‘yin davomida sabr qilishni bilishimiz kerak. Oxir-oqibat raqibning mudofaasini yorib o‘ta olishimizga ishonamiz. Eng muhimi hisobni ochib olishimiz zarur. Bunday o‘yinlarda sabr va o‘yin tempi hal qiluvchi omil bo‘ladi. Biz bunga tayyormiz", — dedi Kennedi.