Австралия аёллар терма жамоаси бош мураббийи Тони Густавссон ва ҳимоячиси Аланна Кеннеди кеча бўлиб ўтган матбуот анжуманида иштирок этиб, Ўзбекистонга қаши ўйин олдидан ўз фикрларини билдириб ўтди.

"Беш кунлик йиғинимиздан кейин футболчилар жисмоний ва руҳий жиҳатдан яхши ҳолатда. Жамоанинг бугунги машғулотида бунга яна бир марта амин бўлдик. Шундай экан, эртанги ўйин олдидан ҳиссиётларим жуда яхши.

Шуни айтишим мумкинки, футолчилар майдонга чиққанида уларга об-ҳавонинг совуқлиги таъси кўрсатмайди. Аввал улар турли иқлим шароитларида ўйнашган. Мураббийлар штабида илмий ва тиббий ходимлар борки, улар футболчиларнинг шароитга мослашиши учун катта ҳажмдаги ишни амалга оширмоқда. Шундай экан, биз ўйинга яхши тайёрланган ҳолатда бўламиз.

Иккита ўйиннинг ораси яқинлигига тўхталадиган бўлсам, биз бунга кўникканмиз. Австралияга қайтганимиздан кейин имкон қадар футболчиларни жавоб ўйинига тайёрлашга ҳаракат қиламиз. Бундан ташқари, мухлислар билан тўла стадионда ўйнаш шогирдларимга куч беради", — деди мураббий.

"Ўзбекистон яхши савиядаги жамоа. Биз уларни ҳурмат қиламиз. Энг муҳими биз ўйин давомида сабр қилишни билишимиз керак. Охир-оқибат рақибнинг мудофаасини ёриб ўта олишимизга ишонамиз. Энг муҳими ҳисобни очиб олишимиз зарур. Бундай ўйинларда сабр ва ўйин темпи ҳал қилувчи омил бўлади. Биз бунга тайёрмиз", — деди Кеннеди.