"PSJ" hujumchisi Gonsalu Ramush "Milan"ning transfer maqsadlaridan biri bo‘lib qolmoqda.
O‘tgan haftada xabar qilinganidek, portugaliyalik futbolchi mavsum oxirida MLSga o‘tishni kutayotgan Olivye Jiruning o‘rnini bosuvchi futbolchi sifatida ko‘rilmoqda. La Reppublica xabariga ko‘ra, "Milan" Ramushni o‘z safiga qo‘shib olmoqchi, biroq italyan klubi futbolchining to‘g‘ridan-to‘g‘ri transferini amalga oshira olmaydi. Kelishuv faqat parijliklar forvardni keyinchalik sotib olish imkoniyati bilan ijaraga berishga rozi bo‘lgan taqdirdagina amalga oshishi mumkin.
Gonsalu Ramushning "PSJ" bilan shartnomasi 2028 yilgacha mo‘ljallangan. Transfermarkt ekspertlari 22 yoshli futbolchining narxini 50 million yevroga baholamoqda.
