Yevropaning kuchli 5ta ligasida qaysi klublar eng yosh tarkibga ega ekanligini bilasizmi?

 Aksincha, qaysi jamoalar tajribani yoshlik shijoatidan ustun qo‘ymoqda?

* Tarkibdagi barcha futbolchilarning o‘rtacha yoshi bo‘yicha reyting tuzilsa, joriy mavsum Yevropaning kuchli 5ta ligasida ishtirok etayotgan klublar «Tuluza» va «Rayo Valyekano» orasiga joylashadi. Oddiy aytganda, eng yosh tarkib «Tuluza»da (o‘rtacha ko‘rsatkich - 23,6). «Valyekano»da esa bu ko‘rsatkich deyarli 30 yoshga yaqin (29,5). Top-ligalarning qolgan 94ta ishtirokchisi shu ikkisi orasida.

* Eng yosh tarkibga ega 10ta klub orasida «Chelsi»ni ko‘rish biroz g‘alati. To‘g‘ri, tarkibni keskin yoshartirish siyosati Todd Bouliga hozircha kutilgan samara keltirayotgani yo‘q. «Monako» va «Shtutgart» esa yosh tarkib bilan tegishlicha Liga 1 va Bundesliga turnir jadvalida 3-o‘rinni egallab turibdi - tasanno!

* 10ta eng yosh tarkibli jamoaga qarasak, Fransiya chempionatidan vakil ko‘p - 4ta. Italiya va Germaniya chempionatlari esa 2tadan yosh klubga ega. Qolgan 2ta «g‘o‘r» jamoa Ispaniya va Angliyadan.

* Tarkibning o‘rtacha yoshi bo‘yicha eng «qariya» 10ta jamoa ro‘yxatining dastlabki 4 pog‘onasi Ispaniya La Ligasi klublariga tegishli. Shundan xulosa chiqarsak, ispanlar faxriylarni e’zozlashda italyanlardan o‘zib ketishdi allaqachon.

* Umuman, 10ta eng «keksa» tarkibdan yarmi aynan Ispaniya chempionatida. Lekin shu 5ta «qariya» jamoadan birgina «Atletiko» kuchli beshlikda, qolganlari turnir jadvalining quyi qismida.

* Italiyaning eng yoshi katta tarkibli jamoasi «A» seriyada chempionlikni deyarli naqd qildi. Ha, Apenninda «Inter» hammadan «katta». Shuningdek, «Lasio» ham Yevropaning top-10ta «qariya»si qatorida. Angliya­da «Fulxem» va «Vest Xem», Germaniyada esa «Boxum» «qariya»lar makoni bo‘lib turibdi. E’tiborlisi, «keksa»larning kuchli 10taligida Fransiya ligasidan biror vakil yo‘q.