Европанинг кучли 5та лигасида қайси клублар энг ёш таркибга эга эканлигини биласизми?

 Аксинча, қайси жамоалар тажрибани ёшлик шижоатидан устун қўймоқда?

* Таркибдаги барча футболчиларнинг ўртача ёши бўйича рейтинг тузилса, жорий мавсум Европанинг кучли 5та лигасида иштирок этаётган клублар «Тулуза» ва «Райо Вальекано» орасига жойлашади. Оддий айтганда, энг ёш таркиб «Тулуза»да (ўртача кўрсаткич - 23,6). «Вальекано»да эса бу кўрсаткич деярли 30 ёшга яқин (29,5). Топ-лигаларнинг қолган 94та иштирокчиси шу иккиси орасида.

* Энг ёш таркибга эга 10та клуб орасида «Челси»ни кўриш бироз ғалати. Тўғри, таркибни кескин ёшартириш сиёсати Тодд Боулига ҳозирча кутилган самара келтираётгани йўқ. «Монако» ва «Штутгарт» эса ёш таркиб билан тегишлича Лига 1 ва Бундеслига турнир жадвалида 3-ўринни эгаллаб турибди - тасанно!

* 10та энг ёш таркибли жамоага қарасак, Франция чемпионатидан вакил кўп - 4та. Италия ва Германия чемпионатлари эса 2тадан ёш клубга эга. Қолган 2та «ғўр» жамоа Испания ва Англиядан.

* Таркибнинг ўртача ёши бўйича энг «қария» 10та жамоа рўйхатининг дастлабки 4 поғонаси Испания Ла Лигаси клубларига тегишли. Шундан хулоса чиқарсак, испанлар фахрийларни эъзозлашда итальянлардан ўзиб кетишди аллақачон.

* Умуман, 10та энг «кекса» таркибдан ярми айнан Испания чемпионатида. Лекин шу 5та «қария» жамоадан биргина «Атлетико» кучли бешликда, қолганлари турнир жадвалининг қуйи қисмида.

* Италиянинг энг ёши катта таркибли жамоаси «А» серияда чемпионликни деярли нақд қилди. Ҳа, Апеннинда «Интер» ҳаммадан «катта». Шунингдек, «Лацио» ҳам Европанинг топ-10та «қария»си қаторида. Англия­да «Фулхэм» ва «Вест Хэм», Германияда эса «Бохум» «қария»лар макони бўлиб турибди. Эътиборлиси, «кекса»ларнинг кучли 10талигида Франция лигасидан бирор вакил йўқ.