Alonso va Arteta ayni damda Yevropaning eng ko‘zga ko‘ringan murabbiylariga aylanib ulgurdi. Ular bugun tarix yozishga yaqin turibdi. Do‘stlar San-Sebastyanning qirg‘oqlarida o‘ynab yurgan davrdan to hozirga qadar ko‘p vaqt o‘tdi. Ayni dam ulardan biri Shimoliy Londonda – Arteta "Arsenal"ni 20 yillik kutishdan keyin Angliya taxtiga qaytarishga juda yaqin kelgan. Xabi Alonsoning "Bayer"i esa bugun, o‘z tarixida ilk bor Germaniyada tengsiz deb topilishi mumkin.

Albatta, bu ikki bask og‘aynilarning taqdir yo‘li juda ham qiziq. Ular o‘z futbol dunyosiga "Antiguoko" yoshlar klubida qadam qo‘yishib, u yerda 10 yoshida birgalikda yarim himoyada o‘ynashadi. Arteta va Alonsoga bolalikda murabbiylik qilgan Roberto Montyel o‘zining ikki shogirdidan juda ham xursand ekanini aytadi. "Antiguoko" klubining prezidenti shunday deydi: "Mikel o‘sha paytlarda doimo o‘zining yoshidan katta guruhda o‘ynardi. U kichkina bo‘lishiga qaramay, doimo kattalardek fikrlagan. Shunda biz uni professional futbolchi bo‘la olishiga ishongandik. Ochig‘ini aytsam, bir umr bu klubda yurib, Mikeldan yaxshirog‘ini hali uchratmadim. U hattoki Alonsodan ham zo‘rroq edi. Menimcha, Artetada doimo murabbiy bo‘lish niyati bo‘lgan".

Mikel Artetaning murabbiylik qobiliyati yoshlikdan ko‘rinish bergan. Ammo Xabi Alonso bilan bu narsalar ancha kech boshlangan. U haqida Montyel shunday deydi:

"Xabining jussasi nisbatan kichkina edi. Shu sababli, u 17 yoshlilar jamoasiga kirgunicha ancha qiynalgan. Shunga qaramay, u maydonda o‘ta tartibli edi. Xabi o‘z vazifasini qanday uddalashni yaxshi anglardi. Hayotda tortinchoq bo‘lgan bu yigitcha, maydonga tushganida, butunlay o‘zgarar edi. Unga o‘yin davomida baqirib ko‘rsatma berish shart emasdi. Xabi meni bir nechta so‘zimdan yaxshi anglab olardi. Shu sababli, bora-bora hamma uni hurmat qiladigan bo‘ldi. U gapirganida qolganlar jim eshitardi".

Alonso "Real Sosyedad" tomonidan 2004 yilda "Liverpul"ga sotiladi. Transfer pulining bir qismi, tabiiyki, "Antiguoko"ga berilgan. Bu pullar yoshlar klubiga yangi bino qurish uchun ishlatiladi.

Roberto Montyel "Antiguoko"ning hozirda yulduz bitiruvchilari bilan yaqin aloqalarga ega. Masalan, "Bornmut" ustozi Andoni Iraola ham aynan Montyel qo‘lida futbolchi bo‘lib yetishgan. Bu haqida u shunday deydi: "Bizdan chiqqan yigitlarning murabbiylikka qadam qo‘yayotgani bejiz emas. Bu narsa bolalarga juda yoshligidan qo‘yiladigan talablarga bog‘liq. Bemalol ayta olamanki, bu narsa bizning madaniyatimizga aloqador. Chunki, "Antiguoko" – hayot maktabi".

ISMATOV J.