O‘zbekistonlik bokschi Elnur Abduraimov "IBA Chempionlar oqshomi" doirasida meksikalik Karlos Ornelasga qarshi kechgan jangi haqida gapirdi.

Jangda Abduraimov hakamlarning yakdil qarori bilan g‘alaba qozongan edi.

"Bugun "IBA Chempionlar oqshomi"dagi birinchi jangimni o‘tkazdim. Musobaqa yaxshi tashkil qilingan. Anchadan beri ring ko‘rmaganim sababli, meksikalik raqibimga qarshi jang o‘zim xohlagandek bo‘lmadi. Yaratganga shukur, shunga qaramay, g‘alaba qozondik.

Ringga hech qachon kuchsiz raqiblar chiqmaydi. Bu boks - boksda hamma narsa oldindan kutiladi. O‘zim oldindan 6 raund jang qilishni rejalashtirgan edim. Chunki, anchadan buyon katta ringga chiqmagan edim. Sababi, oxirgi bor Meksikada o‘tkazgan jangimda ochkolar hisobiga ko‘ra mag‘lubiyatga uchrab, IBF kamarimni boy bergan edim. Mana 1 yildan so‘ng Allohning izni bilan ringga ko‘tarildim. Albatta, buni muxlislar ham yaxshi biladi: 1 yil tanaffusdan keyin ringda o‘zimni tutishim baribir biroz noqulay bo‘ldi. Qiyinchilik bo‘ldi, raqib hech qachon sizga yutqazaman, deb chiqmaydi.

Yaratganga shukur, yaxshi raund o‘tkazdik va ochkolar hisobida g‘alaba qozondik", dedi Elnur Abduraimov.