O‘zbekiston Olimpiya terma jamoasi hamda Fransiyaning “Lans” klubi yarim himoyachisi Abduqodir Husanovga Chilonzor tumani hokimi Saidqahhor Xolxo‘jayev tomonidan changyutkich sovg‘a qilindi.

2 may kuni “Mevazor” mahallasida istiqomat qiluvchi Husanov Abduqodir Hikmatjon o‘g‘li xonadoniga tuman hokimi va o‘rinbosari uning yaqinlarini muborakbod etish uchun tashrif buyurgan.

“Shu o‘rinda eslatib o‘tish joizki, o‘tgan yili ham yosh futbolchilarimizning yutuqlari munosabati bilan tuman hokimi ayni shu xonadonga tashrif buyurib, keyingi g‘alabalarni ham qutlash uchun yana kelamiz, deb xonadon egalari bilan xayrlashgan edi. Niyat xolis ekan, mana o‘sha damlar yetib keldi. Xonadon sohiblari bu xayrli tilaklarni darhol esga olishdi va quvonchiga yana quvonch qo‘shildi”, — deyiladi Chilonzor tumani hokimligi matbuot xizmati bergan xabarda.

Eslatib o‘tamiz, Abduqodir Husanov 3 may kuni bo‘lib o‘tadigan final uchrashuvida ishtirok eta olmaydi. Himoyachi “Lans” tarkibiga borib qo‘shilish uchun Fransiyaga yo‘l olgan.