O‘zbekiston olimpiya terma jamoasi Qatarda o‘tkazilgan U23 Osiyo kubogini ikkinchi o‘rinda yakunlaydigan bo‘ldi.

Yaponiyaga qarshi kechgan final bahsida yigitlarimiz to‘p nazorati, raqibga bosim uyushtirish va yaratilgan vaziyatlar bo‘yicha ustunlikka erishishdi. Ammo yaponiyalik posbon Leo Kokubo juda yaxshi o‘yin namoyish etib, xavflarni bartaraf etdi.

O‘yinning asosiy vaqti tugash arafasida maydon markazida Diyor Xolmatov to‘pni yo‘qotdi. Bu xatoni esa yaponlar kechirishmadi. Fuki Yamada 18 metrlardan aniq zarba berib, hisobni ochishga muvaffaq bo‘ldi.

Ikkinchi bo‘limga qo‘shib berilgan daqiqalar o‘tib borayotganida eronlik hakam VAR yordamida Yaponiya darvozasiga penalti belgiladi. Umarali Rahmonaliyev burchak tomon kuch zarba berdi. Ammo Kokubo zarbani qaytarishga muvaffaq bo‘ldi.

Shu tariqa, Temur Kapadze jamoasi ketma-ket ikkinchi marta kumush medallariga sazovor bo‘ldi. Yaponiya esa ushbu yosh toifasida ikkinchi marta chempionlikni qo‘lga kiritdi.

U23 Osiyo kubogi, final
O‘ZBEKISTON - YAPONIYA - 0:1
Gol: Fuki Yamada (90+1)
Noaniq penalti: Umarali Rahmonaliyev (90+10, darvozabon)
O‘zbekiston: Abduvohid Ne’matov, Azamat Mirsaidov, Alibek Davronov, Ibrohimxalil Yo‘ldoshev, Muhammadqodir Hamraliyev, Diyor Xolmatov, Abdurauf Bo‘riyev, Jasur Jaloliddinov, Ruslan Jiyanov, Husayn Norchayev, Alisher Odilov