Toshkent shahrida sport gimnastikasi bo‘yicha ayollar o‘rtasida lisenzion turnir bo‘lib o‘tadi. Osiyo chempionati 24 may sanasidan boshlanadi.

Ushbu musobaqada afsonaviy o‘zbek gimnasti Oksana Chusovitina ham ishtirok etishi kutilgandi. Biroq u kechagi mashg‘ulotlarda jarohat oldi va juma kuni boshlanadigan musobaqani o‘tkazib yuboradi. Avvalroq Chusovitina Jahon kubogi orqali tayanib sakrash musobaqalarida Olimpiada yo‘llanmasini qo‘lga kirita olmagandi.

Bu Chusovitina uchun Olimpiada yo‘llanmasini qo‘lga kiritish uchun so‘nggi imkoniyat edi va sportchi, afsuski, bu imkoniyatdan foydalana olmadi.  

Oksana Chusovitina faoliyatiga oid statistika va faktlar

— MDH terma jamoasi safida 1992 yilgi Olimpiada chempioni.
— 2008 yilgi Olimpiya o‘yinlari vise-chempioni.
— Uch karra Jahon chempioni (1991 yilda jamoaviy bahslar (SSSR terma jamoasi) va erkin mashq, 2003 yilda tayanib sakrash).
— Jahon chempionatlarida to‘rt karra kumush (1991, 2001, 2005 va 2011 yillar) va 4 karra bronza medali (1992, 1993, 2002, 2006) sohibi.
— Tayanib sakrash bo‘yicha Yevropa chempioni (2008 yil), kumush medal (2002) va uch karra bronza egasi.
— Tayanib sakrash bo‘yicha Jahon Kubogi oltin medal sohibi (2022 yil)
— Sakkizta Olimpiadada qatnashgan yagona gimnastikachi. Sportchi ushbu natijasi evaziga Ginnesning rekordlar kitobiga kiritilgan.