"An-Nasr" hujumchisi Krishtianu Ronaldu sakkiz yil ichida birinchi marta chempionatda urgan gollari sonini 35 taga yetkazdi.

39 yoshli portugaliyalik 31 o‘yinda 35 ta gol urib, Saudiya Ligasining eng yaxshi to‘purari va rekordchisiga aylandi. E’tiborlisi, Ronaldu 2015/16 yilgi mavsumdan beri birinchi marta chempionatda 35 ta gol urishga muvaffaq bo‘ldi.

Ronalduning eng sermahsul mavsumi 2014/15 yilgi mavsum bo‘lib qolmoqda, u La Ligada raqiblar darvozasiga 48 ta gol urgan edi.

Saudiya Arabistoni chempionatining to‘purarlik poygasida “An-Nasr” hujumchisi 28ta gol urgan Aleksandr Mitrovichdan ustun keldi.