Superliga 10-turidan o‘rin olgan "Surxon" – "So‘g‘diyona" (1:0) uchrashuvidan so‘ng mehmonlar murabbiyi Ulug‘bek Boqiyev o‘z fikrlarini bildirib o‘tdi.

"Bunyodkor" bilan bahsda o‘zimizning eng yaxshi o‘yinimizni ko‘rsatgan edik va bugun ham jamoadan xuddi shunday harakatni kutgan edik. O‘z imkoniyatlarimizni golga aylantira olmaganimiz sababli bugun mag‘ulbiyatga uchradik. FIFA kunlaridan foydalanib, xatolarimizni to‘g‘rilashga harakat qilamiz. Hujumkor jamoalarga ham, himoyaga e’tibor qaratuvchi jamoalarga qarshi bellashuvlarda ham o‘z o‘yinimizni ularga o‘tkazmoqchi bo‘lyapmiz.

Doriyev gol va assist qayd etayotgan bo‘lsa, bu birgina uning o‘zining emas, butun jamoaning mehnatidir. U bugun ham o‘zini ko‘rsatgani intildi, afsuski, biroz sovuqqonlik yetishmadi. Lyupcho to‘purarlar poygasida ishtirok etish uchun to‘pni sheriklaridan qizg‘andi, degan gapga qo‘shilmayman. Uning uchun ham, qolgan legionerlar uchun ham jamoaning g‘alabasi muhim sanaladi.

Hujumchining darajasini ko‘pincha kiritgan gollari bilan o‘lchashadi. Mavlonqulov o‘tgan mavsum ko‘proq to‘p kiritgan yokin vaziyat yaratgan bo‘lishi mumkin, ammo uni bu yil bizga foydasi ko‘proq tegmoqda. Samandar o‘z ustida mehnat qilsa, terma jamoaga chaqiruv oladigan potensialga ega.

O‘yindan avval murabbiylar shtabida doim turli rejalar bo‘ladi. Gol kiritsak, qanday harakat qilamiz? O‘tkazsak, kimni maydonga tushiramiz? Bu borada aniq rejamiz bo‘ladi. Bugun gol o‘tkazganimizdan keyingina faollashdik".