Yakshanba kuni Fransiyada mahalliy vaqt bilan tushga yaqin "Mets" va "Sent-Etyen" o‘rtasidagi Liga 1ning ikkinchi pley-off o‘yini oldidan Mets shahridagi vokzalda 150 ga yaqin muxlis mushtlashdi.
Polisiya yig‘ilganlarni tarqatish uchun ko‘zdan yosh oqizuvchi gaz ishlatgan, buning natijasida ba’zi muxlislar avtoturargohga panoh topishgan.
Voqea joyida tutunli bomba va shisha parchalari qolgan. Mozel prefekturasi yetti kishi hibsga olingani haqida xabar berdi.
Uchrashuv davom etar ekan, "Sent-Etyen" ultralari o‘z tribunalaridan "Mets" muxlislariga tutunli bombalar uloqtirishdi. "Mets"ning Liga 2 ga tushib ketganini tasdiqlagan final hushtagi yangraganidan so‘ng stadionda yana tartibsizliklar boshlandi. Muxlislarning bir qismini olib chiqish va tartibni tiklash uchun polisiya aralashuviga to‘g‘ri keldi.
Birinchi o‘yin 2:1 hisobida "Sent-Etyen"ning g‘alabasi bilan yakunlangan.
Javob o‘yinida "Mets" asosiy vaqtda 2:1 hisobida oldinda bo‘lgan bo‘lsa, "Sent-Etyen" qo‘shimcha bo‘limda gol urdi va buning evaziga Liga 1 yo‘llanmasini qo‘lga kiritdi.
