"Bavariya" va Angliya terma jamoasi hujumchisi Xarri Keyn hozirgi formasi haqidagi savolga javob berdi. “Uch sherlar” sardori Bosniya va Gersegovina milliy terma jamoasiga (3:0) qarshi kechgan o‘rtoqlik o‘yinining 61-daqiqasida zaxiradan maydonga tushdi va bitta gol urdi.
30 yoshli hujumchi "Bavariya"ning so‘nggi ikki o‘yinini belidagi muammo tufayli o‘tkazib yuborgan edi.
"Men o‘zimni yaxshi his qilyapman va o‘yinlarni o‘tkazib yuborish ehtiyot chorasi edi. Oldinda bizni muhim yoz kutmoqda, biz tavakkal qilishni xohlamadik. Bundan tashqari, bu qiyin mavsumdan keyin dam olish uchun yaxshi imkoniyat edi.
Mashg‘ulotlarda yaxshi hafta o‘tkazdim, bugun daqiqalar oldim va juma kuni Islandiyaga qarshi yana o‘ynashga aminman. Men guruh bosqichiga tayyorman. Klub mavsumi yakunidagi dam olish menga faqat foyda keltiradi", - deydi Keyn.
