"Бавария" ва Англия терма жамоаси ҳужумчиси Харри Кейн ҳозирги формаси ҳақидаги саволга жавоб берди. “Уч шерлар” сардори Босния ва Герцеговина миллий терма жамоасига (3:0) қарши кечган ўртоқлик ўйинининг 61-дақиқасида захирадан майдонга тушди ва битта гол урди.
30 ёшли ҳужумчи "Бавария"нинг сўнгги икки ўйинини белидаги муаммо туфайли ўтказиб юборган эди.
"Мен ўзимни яхши ҳис қиляпман ва ўйинларни ўтказиб юбориш эҳтиёт чораси эди. Олдинда бизни муҳим ёз кутмоқда, биз таваккал қилишни хоҳламадик. Бундан ташқари, бу қийин мавсумдан кейин дам олиш учун яхши имконият эди.
Машғулотларда яхши ҳафта ўтказдим, бугун дақиқалар олдим ва жума куни Исландияга қарши яна ўйнашга аминман. Мен гуруҳ босқичига тайёрман. Клуб мавсуми якунидаги дам олиш менга фақат фойда келтиради", - дейди Кейн.
