Diyego Maradonaning “Oltin to‘p”i auksiondan olib tashlandi.
1986 yilgi jahon chempionatidagi Argentina g‘alabasidan 10 yil o‘tib Maradonaga berilgan “Oltin to‘p” kimoshdi savdosida sotilishi, sovrinning o‘zi esa bir necha millionga baholangani avvalroq xabar qilingandi.
Keyinchalik savdo to‘xtatildi - Diyegoning oila a’zolarining ta’kidlashicha, mukofot ulardan 1989 yilda o‘g‘irlangan.
Bugun Fransiya sudi “Oltin to‘p”ni sotishni taqiqlash va kubok bilan nima sodir bo‘lganligi aniq bo‘lmaguncha uni tortib olishga qaror qildi.
Aguttes auksion uyi sovrinni 6 iyun kuni kimoshdi savdosiga qo‘yishni rejalashtirgan edi. Bu sport tarixidagi eng qimmat lotga aylanishi mumkin.
