Ispaniyada 2010 yilgi jahon chempioni, «Barselona»ning sobiq yarim himoyachisi Andres Inyesta haykali ochildi.
Marosim futbolchining vatani Albaseteda bo‘lib o‘tdi. Unda Inyesta Janubiy Afrikada bo‘lib o‘tgan jahon chempionati finalida gol urgan vaziyatda to‘p tepayotgani tasvirlangan. Aynan uning Niderlandiya bilan o‘yinda (1:0) 116-daqiqada urgan goli jahon chempionatidagi «qizil furiya»ga g‘alaba keltirgandi.
2002 yildan 2018 yilgacha Inyesta «Barselona»da o‘ynadi va u bilan to‘qqiz karra Ispaniya chempioni, olti karra mamlakat kubogi va to‘rt karra Chempionlar ligasi g‘olibi bo‘ldi. Hozirda 40 yoshli yarim himoyachi BAAning «Emireyts» jamoasida to‘p surmoqda.
