Fransiya terma jamoasi himoyachisi Vilyam Saliba Yevro-2024 doirasidagi Avstriya ustidan qozonilgan g‘alabadan so‘ng (1:0) Fransiya terma jamoasi sardori Kilian Mbappening jarohatidan xavotir bildirdi.
“Bu mening Fransiya terma jamoasi uchun yirik turnirda ilk bor asosiy tarkibda maydonga tushishim, lekin hammasi yaxshi o‘tdi, xursandman. Men Kilianni hali ko‘rganim yo‘q, lekin u xafa bo‘lganini bilaman va u tuzalib ketishiga umid qilaman, chunki u bizga kerak. Avstriya juda yaxshi jamoa, ular uzoq vaqt davomida mag‘lubiyatsiz o‘yin ko‘rsatdi, shuning uchun biz xursandmiz. Yaxshilash kerak bo‘lgan narsalar bor, lekin eng muhimi birinchi o‘yinda g‘alaba qozonish. Biz turnirni yaxshi boshladik", - deya Salibaning so‘zlaridan iqtibos keltiradi L'Equipe.
Navbatdagi o‘yinda Fransiya 21 iyun kuni Niderlandiyaga qarshi maydonga tushsa, shu kuni Avstriya Polsha bilan to‘qnash keladi.